بشرة قوية ضد البرد

موضوع: بشرة قوية ضد البرد 5th يناير 2008, 4:23 pm

بشرة قوية ضد البرد"
في البداية وقبل ما نفكر في "الماكياج" و"النيولوك"... لازم نهتم بصحة البشرة، نعالجها ونحميها من آثار برد الشتا عليها؛ وعلشان بشرتك تفضل محتفظة بنضارتها اتبعي الخطوات التالية:
1. غسل البشرة بالمياه الدافئة بيفقدها الزيوت الطبيعية الموجودة في البشرة.. علشان كده... المياه الفاترة بتكون أفيد للبشرة من المياه الدافئة.
2. بعد غسل البشرة بالمياه الفاترة يجب تنشيفها جيدًا، وده لسببين: السبب الأول هو تجنب الإصابة بالبرد، والسبب التاني لتجنب التقشفات اللي ممكن تحصل لو البشرة تعرضت للهوا وهي مبلولة.
3. ولو كنتِ في الطبيعي بتستخدمي مستحضرات تنظيف تحتوي على مواد كحولية وعطرية حاولي تتجنبيها هذه الأيام لأن البشرة بتكون أكثر حساسية والمواد دي ممكن تؤدي لحدوث التهابات... وممكن تستخدمي بدلاً منها المستحضرات الخفيفة الخالية من هذه المواد واللي متوفرة في كل الصيدليات، مثل صابون الجلسرين، أو صابون زيت الزيتون.
4. حمامات البخار مهمة جدًا في الأيام دي وخصوصًا للبشرة الدهنية وده لأن -للأسف- أصحاب البشرة الدهنية بشرتهم بتصاب بالجفاف مع ظهور البثور والرؤوس السوداء، والفايدة اللي بيقدمها حمام البخار في هذه الحالة هو توسيع المسام، وبالتالي بيكون من السهل إنك تنضفي البشرة بالمياه الباردة بعد كده لغلق المسام مرة تانية.
5. شرب المياه شيء مفيد جدًا للبشرة في كل الفصول... مش في الشتا فقط علشان كده ننصحك إنك تتناولي كمية كافية من المياه؛ لأن المياه بتعوض الرطوبة اللي بتفقدها البشرة بسبب البرودة...
6. تناول الوجبات التي تحتوي على فيتامين “C” و “A” بيغذي البشرة بشكل جيد وبيبعدها عن مقاومة الجفاف...
7. ما تنسيش الكريمات المرطبة، وعمل تدليك للبشرة بالكريم المرطب بصورة يومية ومن الأفضل كمان إنك تستخدمي الكريم في كل مرة تقومي فيها بغسل إيدك ووجهك...
8. جفاف الشفتين... أثبتت تجارب جدودنا إن المشكلة دي لها 3 حلول...
الأول: هو "الفازلين" وده بإنك تضعي طبقة من "الفازلين" على الشفايف بعد غسلها وتنشيفها. الحل التاني هو "الجلسرين السايل" وده مفعوله قوي وأكيد. الحل التالت، حل من الطبيعة وهو الطحينة واللي أكدوا جدودنا على فايدتها الكبيرة في علاج تشققات والتهاب الشفتين ويتم استخدامها بنفس طريقة استخدام "الفازلين" و"الجلسرين".
9. أما خشونة القدمين فحلها بسيط جدًا.. وحلها حمام المياه والفازلين... ازاي...؟
ضعي رجليكِ في مياه تكون ساخنة على قد ما تقدري. بعد 5 دقائق ادعكي رجليكِ بالحجر الخفافي. اتأكدي من إزالة كل الجلد الميت وبعدين نشفي رجليكِ كويس. ضعي طبقة سميكة من الفازلين على كعوب رجليكِ. البسي كيس بلاستيك في رجليكِ وعليه شراب. انتظري لمدة من 10 إلى 15 دقيقة وصدقيني هتلاقي فيه فرق رائع..

» بنااااااات...... 10 دقائق للحصول على بشرة نضرة كل
» قوية قوية قوية