هل الاختلاف فى شخصياتنا ميزة ولا عيب؟

فى رأيى إنه ميزة كبيرة قوى.. عشان باختلاف الشخصيات بتظهر تعددية فى الاحتياجات، بمعنى احتياجنا لكل شخصية مختلفة بطريقة مجتمعة بيحقق لنا الهدف فى النهاية... وده اللى بيخلينا نحتاج لفريق عمل.

وفريق العمل بيكون عبارة عن مجموعة من الأشخاص إتنقوا بعناية بناءاً على عدة اعتبارات.

فى دراسات وضحت إن البنى آدميين دول عبارة عن كذا شخصية بتختلف فى محتواها ومضمونها اختلاف كبير عن أى شخصية تانية.... مثلاً عندنا الشخصية الانطوائية... واللى صاحبها دايماً بيسمع أكتر ما بيتكلم... ودي طبعاً قاعدة مطلوبة جداً فى فريق العمل. أما الشخصية الاجتماعية، فصاحبها غالباً بيتكلم كتير، بس كمان بيقدر يكوّن علاقات وممكن يكون شخصية بناءة فى الفريق.

وفى الشخصية العملية اللى صاحبها اتعود يعمل كل حاجة بالتفصيل وبطريقة عملية وبياخد بالحقائق والتوجيهات، وعلى عكسه صاحب الشخصية الحدسية اللى بيعتمد على إحساسه فى شغله وبيوظف خياله علشان يقدر يوصل للأفضل من الموجود.

وفى الشخصية المنظمة اللى صاحبها إتعود دايماً إن كل حاجة فى حياته تبقى منظمة ومنضبطة ومتخطط لها وده ما بيعرفش يعمل حاجة ما يكونش رتبلها قبل كده.... وأكيد علي عكسه الشخصية غير المنظمة أو اللى إتعود إنه يتزنق فى آخر الوقت علشان يقدر ينجز ويشتغل صح، وطبعاً ده مش بيمشى بنظام ولا خطط ولا أى حاجة... بس غالباً بيكون سريع فى إنجاز عمله علشان هو اتعود على الإنجاز فى وقت قصير.

السؤال هنا إزاى نقدر نكون فريق عمل من الشخصيات المختلفة دى؟

علشان نكون فريق عمل يضم كل الشخصيات دى لازم نزرع جواهم الأول مبدأ تقبل الآخر. يعنى لازم صاحب الشخصية الاجتماعية ما يبصش للإنطوائى على إنه شخص ما لوش تأثير فى المجتمع، بالعكس، الشخص الإنطوائى عنده صفة لازم تكون موجودة فى قائد الفريق وهى إنه بيسمع أكتر ما بيتكلم. وكمان صاحب الشخصية العملية لازم يعرف إنه محتاج خيال صاحب الشخصية الحدسية.... يعنى كلنا لازم نفهم الحكمة من إننا مختلفين وهى إننا بنحتاج لبعض ولما نشتغل مع بعض نكمل بعض.

تفتكر مبدأ تقبل الآخر ده موجود في مجتمعنا؟

فعلا الاختلاف مطلوب لكى نكمل بعضا البعض ومع كامل تحياتى

انا اجد انه لابد من الاختلافات لتجد الطريق الصحيح
يسلمووووووووووووووو الايادي cheers